Gold Details: 18, 22 ಮತ್ತು 24 ಕ್ಯಾರಟ್ ಚಿನ್ನದ ನಡುವಿನ ವ್ಯತ್ಯಾಸ ಏನು, ಯಾಕೆ 22 ಕ್ಯಾರಟ್ ಚಿನ್ನ ಮಾತ್ರ ಖರೀದಿಸುತ್ತಾರೆ.

Gold Carat Details: ಸಾಮಾನ್ಯವಾಗಿ ಭಾರತದಲ್ಲಿ ಚಿನ್ನಕ್ಕೆ ವಿಶೇಷ ಸ್ಥಾನವಿದೆ. ಚಿನ್ನವನ್ನು ಧರಿಸಿದರೆ ಒಂದು ರೀತಿಯಲ್ಲಿ ಭಾರತೀಯ ಸಂಪ್ರದಾಯವನ್ನು ಮೆರೆಸಿದಂತೆ ಭಾಸವಾಗುತ್ತದೆ. ಇನ್ನು ಮಹಿಳೆಯರಿಗೆ ಚಿನ್ನದ ಮೇಲೆ ಒಲವು ಹೆಚ್ಚಿರುತ್ತದೆ. ಹೆಚ್ಚು ಚಿನ್ನ ಧರಿಸುವುದರಲ್ಲಿ ಮಹಿಳೆಯರದ್ದೇ ಮೇಲುಗೈ ಇದೆ ಎನ್ನಬಹುದು.

ಇನ್ನು ಚಿನ್ನದ ಪರಿಶುದ್ಧತೆಯನ್ನು ಕ್ಯಾರೆಟ್ ನಲ್ಲಿ ಅಳೆಯಲಾಗುತ್ತದೆ. ಹೆಚ್ಚು ಕ್ಯಾರೆಟ್ ಚಿನ್ನದ ಧರಿಸಿದರೆ ಅದರ ಮೌಲ್ಯ ಇನ್ನಷ್ಟು ಹೆಚ್ಚಾಗುತ್ತದೆ. ನಾಣ್ಯಗಳು, ಆಭರಣಗಳು, ಬಾರ್‌ ಗಳು, ಬಿಸ್ಕತ್ತುಗಳಂತಹ ಯಾವುದೇ ಚಿನ್ನದ ಉತ್ಪನ್ನವು ಕ್ಯಾರೆಟ್ ಉಲ್ಲೇಖವನ್ನು ಹೊಂದಿರುತ್ತದೆ. ಸಾಮಾನ್ಯವಾಗಿ ಕ್ಯಾರೆಟ್‌ ನಲ್ಲಿ ಮೂರು ವಿಧಗಳಿವೆ. 18 ಕ್ಯಾರೆಟ್, 22 ಕ್ಯಾರೆಟ್ ಮತ್ತು 24 ಕ್ಯಾರೆಟ್. ನಾವೀಗ ಈ ಲೇಖನದಲ್ಲಿ ಈ ಮೂರು ಕ್ಯಾರೆಟ್ ಗಳ ನಡುವಿನ ವ್ಯತ್ಯಾಸದ ಬಗ್ಗೆ ಮಾಹಿತಿ ನೀಡಲಿದ್ದೇವೆ.

18, 22 ಮತ್ತು 24 ಕ್ಯಾರಟ್ ಚಿನ್ನದ ನಡುವಿನ ವ್ಯತ್ಯಾಸ ಏನು
•24 ಕ್ಯಾರೆಟ್ ಗೋಲ್ಡ್
24 ಕ್ಯಾರೆಟ್ 100 ಪ್ರತಿಶತ ಶುದ್ಧ ಚಿನ್ನವಾಗಿದೆ. ಈ ಚಿನ್ನವು ಶುದ್ಧ ಚಿನ್ನವಾಗಿದ್ದು ಇದರಲ್ಲಿ ಬೇರೆ ಯಾವುದೇ ಲೋಹಗಳು ಮಿಶ್ರಣವಾಗಿಲ್ಲ. ಇದು ಮಾರುಕಟ್ಟೆಯಲ್ಲಿ 99.9% ಶುದ್ಧವಾಗಿದೆ ಎಂದು ಹೇಳಬಹುದು. 24 ಕ್ಯಾರೆಟ್ ಚಿನ್ನವು ಪ್ರಕಾಶಮಾನವಾದ ಹಳದಿ ಬಣ್ಣವನ್ನು ಹೊಂದಿರುತ್ತದೆ. ಈ 24 ಕ್ಯಾರೆಟ್ ಚಿನ್ನವು 18 ಅಥವಾ 22 ಕ್ಯಾರೆಟ್‌ ಗಿಂತ ಹೆಚ್ಚು ದುಬಾರಿಯಾಗಿದೆ. ಆದಾಗ್ಯೂ, ಈ ಚಿನ್ನದ ಕಡಿಮೆ ಗಡಸುತನದ ಕಾರಣ, ಇದನ್ನು ಆಭರಣ ತಯಾರಿಕೆಯಲ್ಲಿ ವ್ಯಾಪಕವಾಗಿ ಬಳಸಲಾಗುವುದಿಲ್ಲ. ಚಿನ್ನದ ನಾಣ್ಯಗಳು, ಬಿಸ್ಕತ್ತುಗಳು, ಬಾರ್‌ ಗಳನ್ನು ತಯಾರಿಸಿ ಸಂಗ್ರಹಿಸಲಾಗುತ್ತದೆ. ಈ ಕ್ಯಾರೆಟ್ ಚಿನ್ನವನ್ನು ಎಲೆಕ್ಟ್ರಾನಿಕ್ಸ್ ಮತ್ತು ವೈದ್ಯಕೀಯ ಸಾಧನಗಳ ತಯಾರಿಕೆಯಲ್ಲಿಯೂ ಬಳಸಲಾಗುತ್ತದೆ.

•22 ಕ್ಯಾರೆಟ್ ಗೋಲ್ಡ್
ಹೆಚ್ಚಿನ ಆಭರಣಗಳು 22 ಕ್ಯಾರೆಟ್ ಚಿನ್ನದಿಂದ ಮಾಡಲ್ಪಟ್ಟಿದೆ. ಚಿನ್ನದ ಜೊತೆಗೆ ಬೆಳ್ಳಿ, ನಿಕಲ್, ಸತು ಮತ್ತು ಇತರ ಮಿಶ್ರಲೋಹಗಳನ್ನು ಇದಕ್ಕೆ ಸೇರಿಸಲಾಗುತ್ತದೆ. 22 ಕ್ಯಾರೆಟ್ 91.67 ಪ್ರತಿಶತ ಶುದ್ಧ ಚಿನ್ನವಾಗಿದೆ. ಇತರ ಲೋಹಗಳು ಚಿನ್ನದ ವಿನ್ಯಾಸವನ್ನು ಗಟ್ಟಿಗೊಳಿಸಬಹುದು. ಹಾಗಾಗಿ ಆಭರಣಗಳು ಬಾಳಿಕೆ ಬರುತ್ತವೆ.

•18 ಕ್ಯಾರೆಟ್ ಗೋಲ್ಡ್
ಇನ್ನು 18 ಕ್ಯಾರೆಟ್ 75 ಪ್ರತಿಶತ ಚಿನ್ನವನ್ನು ಹೊಂದಿರುತ್ತದೆ. ಉಳಿದ 25 ಪ್ರತಿಶತವನ್ನು ತಾಮ್ರ, ಬೆಳ್ಳಿ ಮತ್ತು ಇತರ ಮಿಶ್ರಲೋಹಗಳಿಂದ ತಯಾರಿಸಲಾಗುತ್ತದೆ. ಸ್ಟೋನ್ ಸ್ಟಡೆಡ್ ಆಭರಣಗಳು ಅಥವಾ ವಜ್ರದ ಆಭರಣಗಳು 18 ಕ್ಯಾರೆಟ್ ಚಿನ್ನದಿಂದ ಮಾಡಲ್ಪಟ್ಟಿದೆ. ಇದು 24 ಕ್ಯಾರೆಟ್ ಅಥವಾ 22 ಕ್ಯಾರೆಟ್ ಚಿನ್ನಕ್ಕಿಂತ ಕಡಿಮೆ ವೆಚ್ಚವಾಗುತ್ತದೆ.

ಎಷ್ಟು ಕ್ಯಾರೆಟ್ ಚಿನ್ನ ಎನ್ನುವುದನ್ನು ಗುರುತಿಸುವುದು ಹೇಗೆ…?
ಎಲ್ಲಾ ಚಿನ್ನದ ನಾಣ್ಯಗಳು, ಬಾರ್‌ ಗಳು ಮತ್ತು ಆಭರಣಗಳನ್ನು ಹಾಲ್‌ ಮಾರ್ಕ್ ಮಾಡಲಾಗಿದೆ. ಇದು ಎಷ್ಟು ಕ್ಯಾರೆಟ್ ಚಿನ್ನ ಎಂದು ನಿಮಗೆ ತಿಳಿಸುತ್ತದೆ. ಚಿನ್ನದ ಆಭರಣ ಅಥವಾ ಇತರ ಉತ್ಪನ್ನಗಳನ್ನು ಖರೀದಿಸುವಾಗ, ಕ್ಯಾರೆಟ್ ಮೌಲ್ಯವು ಒಂದು ವಿಶಿಷ್ಟ ಅಂಶವಾಗಿದೆ. ಆಭರಣ ಮತ್ತು ಚಿನ್ನದ ಖರೀದಿದಾರರು ಇದನ್ನು ಎಚ್ಚರಿಕೆಯಿಂದ ಪರಿಶೀಲಿಸಬೇಕು. ದಿನನಿತ್ಯದ ಬಳಕೆಗೆ 22 ಕ್ಯಾರೆಟ್ ಚಿನ್ನ ಉತ್ತಮವಾಗಿದೆ. ತಾಮ್ರ, ಸತು ಮತ್ತು ಬೆಳ್ಳಿಯಂತಹ ಮಿಶ್ರಲೋಹಳನ್ನು ಹೊಂದಿದ್ದು, ಚಿನ್ನಕ್ಕೆ ಹೆಚ್ಚು ಪರಿಶುದ್ಧತೆಯನ್ನು ನೀಡುತ್ತದೆ.